Áhugafólk um kappakstur ætti að leggja leið sína í Hafnarfjörðinn næstu helgi þar sem Road race æfing fyrir mótorhjól verður haldin. Þetta er í annað sinn sem RR-AÍH (Road race deild Akstursíþróttafélags Hafnarfjarðar) stendur fyrir álíka viðburði en síðast var haldin æfing um mánaðarmótin júní-júlí. Þá tóku um 30 manns þátt við bestu hugsanlegu aðstæður í blíðskaparveðri.
Búið er að útbúa 2,2 km lokaða braut í Hellnahverfi í Hafnarfirði sem býður upp á mjög skemmtilegan akstur. Æfingin verður haldin helgina 11. og 12.
ágúst n.k. og er opin öllum sem vilja taka þátt en skilyrði fyrir þáttöku eru fullgilt ökupróf, fullskoðað hjól og viðurkenndur öryggisbúnaður.
Byrjendur er sérstaklega hvattir til að taka þátt til að bæta getu sína við öruggar aðstæður en skipt verður upp í hópa eftir getu og gerð hjóla.
Skráning er opin á vefsíðu félagsins
www.road-race.net til miðnættis föstudagsins 10. ágúst. Enginn aðgangseyrir er fyrir áhorfendur.
